Kama kuna timu ambayo Yanga SC inapaswa kuichukulia kwa umakini mkubwa kwenye kundi lao la msimu huu, basi ni JS Kabylie ya Algeria — klabu yenye historia ndefu, rekodi ya mafanikio makubwa, na sifa ya kuwa wapinzani wagumu zaidi kukabiliana nao.
JS Kabylie ni moja ya timu ambazo zinacheza mpira wa kasi, nidhamu, na nguvu za ajabu. Ni timu ambayo haipumziki uwanjani; wachezaji wake wanakimbia muda wote, wakitumia kila nafasi kushambulia na kulinda kwa umakini. Ili kuhimili mchezo wao, unahitaji ukomavu mkubwa, uvumilivu, na ubora wa hali ya juu ndani ya kikosi. Bila hayo, ni rahisi kupoteza mchezo mbele yao.
Kihistoria, JS Kabylie ni klabu yenye mafanikio kuliko zote nchini Algeria — katika ngazi ya kitaifa na kimataifa. Ni klabu pekee nchini humo ambayo haijawahi kushuka daraja tangu ilipoanzishwa, jambo linaloonyesha uimara na uthabiti wao wa muda mrefu. Wakati wengi wakiwataja Belouzdad, MC Alger, au USM Alger, ukweli ni kwamba Kabylie ndiye mbabe wa kweli wa soka la Algeria, japokuwa walipoteza mwelekeo kwa muda mfupi kabla ya kurejea kwa nguvu katika ramani ya soka la Afrika.
Kwa sasa, JS Kabylie imejipanga upya — wana kikosi chenye vipaji halisi na kocha mwenye falsafa ya kisasa ya mpira wa kushambulia. Ni timu ambayo ukiichukulia poa, inakuadhibu bila huruma. Wana uwezo wa kushindana na wakubwa kama ASFAR, Al Ahly , lakini hawajawahi kuwa rahisi kwa yoyote kati yao.
Kwa Yanga SC, hii ni changamoto ya kweli na kipimo cha safari yao ya kuelekea mafanikio makubwa Afrika. Huwezi kupata mafanikio kwa kukwepa kukutana na walio bora. Ni kupitia mechi kama hizi ndipo timu hupima uimara wake, hujua udhaifu wake, na kuchora upya ramani ya mafanikio.
JS Kabylie ni “Sleeping Giant” — amelala, lakini akiamka, anaweza kusababisha tetemeko kubwa kwenye michuano ya CAF.
